ԱՐՇԱԿ ՋԱՄԱԼՅԱՆ (ԻՍԱՀԱԿՅԱՆ)

Գործունեությունը` հաս-քաղ. գործիչ

Բնակավայրը` Հայաստան

Հասարակական-քաղաքական, պետական գործիչ:
ՀՀԴ կուսակցության անդամ:

Ծնվ. 1882թ., Գանձակ:
Մահ. 22.12.1940թ., Փարիզ:

Ավարտել է Էջմիածնի Գևորգյան ճեմարանը (1901):

1905թ-ի հայ-թաթարական ընդհարումների ժամանակ մասնակցել է ցարական ոստիկանապետի ահաբեկչությանը, որի համար բանտարկվել է:

1906թ-ին Գերմանիայում ուսումնասիրել է հասարակական գիտություններ, հիմնադրել ՀՀԴ Եվրոպայի հայ ուսանողական միությունը, հրատարակել «Ուսանող» պարբերականը և հայ ազգային-ազատագրական պայքարը լուսաբանող գրքույկներ (հայ., ֆրանս., գերմ.):

1909թ-ին վերադարձել է Կովկաս, դասավանդել է Թիֆլիսի Ներսիսյան դպրոցում, աշխատակցել «Հորիզոն » (1909-18) օրաթերթին:

Առաջին աշխարհամարտի (1914-18) տարիներին հայ կամավորական ջոկատների կազմակերպիչներից էր:

1917թ-ի հոկտեմբերից՝ հայոց Ազգային խորհրդի անդամ:

Մասնակցել է Երզնկայի զինադադարի կնքմանը (1917թ-ի դեկտեմբեր):
Անդրկովկասյան սեյմի անդամ:

Եղել է Հայոց ազգային խորհրդի (1918-ին)՝ Բեռլին մեկնած Ազգային պատվիրակության կազմում,
1918թ-ին՝ ՀՀ (1918-20) դեսպան Թիֆլիսում,
1919թ-ին՝ խորհրդարանի անդամ, զինահավաքման արտակարգ կոմիսար,
1920թ-ին՝ հաղորդակցության ճանապարհների նախարար:

1920թ-ի օգոստոսի 10-ին Թիֆլիսում ստորագրել է զինադադարի համաձայնագիր Խորհրդային Ռուսաստանի ներկայացուցիչ Բ. Լեգրանի հետ:

1921թ-ին մասնակցել է բոլշևիկների և դաշնակցականների միջև Ռիգայի բանակցություններին:

Հայաստանի խորհրդայնացումից (1920թ-ի դեկտեմբերի 2) հետո անցել է Թիֆլիս, ապա՝ Կ. Պոլիս, այնուհետև՝ Ֆրանսիա:

Աշխատակցել է 1925-33թթ-ին Փարիզում հրատարակվող «Դրոշակ» ամսագրին:
1934թթ-ին կազմակերպել է Հայ-վրացական միությունը:

Գրել է «Դաշնակցութեան տեսութիւնը » (1908) աշխատությունը, թատերգություններ՝ «Տարերքի ընդվզումը», «Գծից դուրս», «Նահապետ Նահապետյան» և այլն:

Երկեր.
Հայաստանի անկախութեան խնդիրը եւ Ռուսաստանը, «Հուսաբեր», 1938, հունիսի 8-11:

Գրակ.
Չթչյան Ս., Յուշեր Արշակ Ջամալեանի մասին, «Հայրենիք», 1941, № 5-6:
Լազյան Գ., Դէմքեր հայ ազատագրական շարժումէն, Կահիրե, 1949, էջ 286-303: