ԲՈՒՏ

Գործունեությունը` Ճարտարապետ

Բնակավայրը` Հայաստան

Ծննդյան և մահվան թվերն անհայտ են:

Ճարտարապետ:

Ստեղծագործել է իշխան Ջալալ Օրբելյաևի տիրույթում,
նրա և կնոջ՝ Իվանե Ձաքարյանի դուստր Գոնցայի պատվերով, վանահայր Կիրակոս վարդապետի ղեկավարությամբ 1301-ին կառուցել է Հովհաննես Կարապետի վանքի (ՀՀ Արարատի մարզում՝ լքյալ Զինջիրլու գ. մոտ՝ Ուրծի լեռների հս. փեշին՝ Վեդի-Լուսաշող ճանապարհի աջ կողմում) Սպիտակավոր Ս. Աստվածածին եկեղեցին, ըստ Ա. Բարխուդարյանի՝ նաև անթվական ու անստորագիր մյուս բոլոր շենքերը՝ տապանատունը, բրգանման եկեղեցի - «զանգակատունը»՝ «իրար խիստ նման»:

Սպիտակավոր Ս. Աստվածածին եկեղեցու գլանաձև թմբուկի չորս կողմերի վրա բացվող լուսամուտների կողքերին կան արձանագիր-գրիչ Տիրացուի և ճարտ. Բուտի (ԲՏ-Բուտ, Տհ ՅՇ - Տիրացու յիշեցէք) անունների՝ զարդաքանդակներին փոխարինող սղում-զարդագրերը:

Եկեղեցու միակ՝ արմ. շքամուտքի ճակատակալ քարին Սարգիս Վարդապետ Նկարչի բարձրարվեստ քանդակներն են:

Եկեղեցու ներսում, հվ. պատին հպված կիսասյան արմ. երեսին, Բուտի անունն է՝ «ժրաջան աշխատող» համարումով, հինգ տող արձանագրությամբ:

Գրակ.
Բարխուդարյան Ս., Միջնադարյան հայ ճարտարապետներ Ա քարգործ վարպետներ, Ե., 1963, Էջ 101-103: