ԳՐԻԳՈՐ Բ ՎԿԱՅԱՍԵՐ

Գործունեությունը` Կրոնական գործիչ

Բնակավայրը` Հայաստան

Ավազանի անունը՝ Վահրամ:

Ծննդյան թիվն անհայտ է:
Մահ. 1105թ., Քեսուն, ամփոփվել է Կարմիր վանքում (Լեռնային Կիլիկիա):

Ամենայն հայոց կաթողիկոս 1066-ից:

Գրիգոր Մագիստրոս Պահլավունու որդին:

Հիմնադիրն է Պահլավունի կաթողիկոսական տան, որի ներկայացուցիչները գահակալել են 137 տարի:

Հաջորդել է Խաչիկ Բ Անեցուն:

Հոր մահից հետո փոխարինել է նրան Միջագետքի դուքսի պաշտոնում (1059), սակայն շատ չանցած՝ դարձել է վանական:

Կաթողիկոս է ձեռնադրվել Փոքր Հայքի Ծամնդավ բերդաքաղաքում (ԳՐԻԳՈՐ Բ ՎԿԱՅԱՍԵՐի օրոք՝ կաթողիկոսանիստ):

Տարբեր տարիներ աթոռակից է նշանակել Գևորգ Լոռեցուն (1066-72), Բարսեղ Ա Անեցուն:

1076-ին մերժել է Փիլարտոս Վարաժնունու՝ հայրապետական աթոռը Փառիսոս փոխադրելու առաջարկը և թույլատրել նրան կաթողիկոսություն հիմնել Հոնի բերդաքաղաքում (Մարաշի մոտ):

ԳՐԻԳՈՐ Բ ՎԿԱՅԱՍԵՐը եղել է Կ. Պոլսում (1066 և 1072), Եգիպտոսում (1074 և 1085) և Երուսաղեմում, որի գրավման ժամանակ (1099) օժանդակել է խաչակիրներին:

Եգիպտոսում նրան մեծ պատվով ընդունել է Մուսթանսիր խալիֆան:

ԳՐԻԳՈՐ Բ ՎԿԱՅԱՍԵՐն իր եղբորորդուն՝ Գրիգոր Պահլավունուն, ձեռնադրել է եպիսկոպոս և նշանակել Եգիպտոսի հայոց առաջնորդ:

Հայտնի է 1102-ին Ծռազատկի կապակցությամբ գրված ԳՐԻԳՈՐ Բ ՎԿԱՅԱՍԵՐի «Թուղթը»:

Նրա մեկենասությամբ Կիրակոս մեկնիչը հունարենից հայերեն է թարգմանել բազմաթիվ վարքագրական և հայրաբանական երկեր (այստեղից՝ «Վկայասեր» մականունը):

Իր գրած «Տօնամակ» ժողովածույում փորձել է Հովհաննես Սարկավագի անշարժ տոմարի հաստատման հետ կապված կայուն օրեր սահմանել:

ԳՐԻԳՈՐ Բ ՎԿԱՅԱՍԵՐի կաթողիկոսության շրջանում սերտացել են Հայ եկեղեցու փոխհարաբերությունները Ասորի Հակոբիկ, Հույն և Հռոմի եկեղեցիների հետ, որը շարունակվել է հաջորդ Պահլավունիների կողմից:

Կաթողիկոսական գահին ԳՐԻԳՈՐ Բ ՎԿԱՅԱՍԵՐին հաջորդել է Բարսեղ Ա Անեցին: