KOSTANDIN D / ԿՈՍՏԱՆԴԻՆ Դ

Գործունեությունը` Թագավոր

Բնակավայրը` Հայաստան

Կիլիկյան Հայաստանի թագավոր 1345-ից:

Ծննդյան թիվն անհայտ է:
Մահ. 1363թ.:

Հեթումյանների ազգականը (մայրը՝ Սարիունեն, Սմբատ Գունդստաբլի թոռն էր), մեծ մարաջախտ և Նոր բերդի տեր Բաղդինի որդին:
Հաջորդել է Կոստանդին Գ Լուսինյանին:
Համախմբելով հայրենասեր իշխաններին՝ 1346-ին դիմակայել է մամլուքների և թուրքմենների հարձակմանը, ազատագրել Կապան բերդը:

1347-ի ամռանը ջախջախել է Կիլիկիա ներխուժած Եգիպտոսի սուլթանության առաջապահ գնդերը, աշնանը Կիպրոսի նավատորմիղի աջակցությամբ ազատագրել Այասը: Սակայն Եգիպտոսի սուլթանությունը, մերժելով ԿՈՍՏԱՆԴԻՆ Դ-ի հաշտության առաջարկը, կրկին զավթել է Այասը, իսկ նրա դաշնակիցներ Իկոնիայի սուլթանը, Հալեպի ամիրան՝ երկրի այլ շրջաններ:
Օգտվելով Եգիպտոսում ծագած գահակալական կռիվներից՝ ԿՈՍՏԱՆԴԻՆ Դ-ն Հռոդոսի Ս. Հովհաննես ասպետական օրդենի օգնությամբ ջախջախել է Հալեպի ամիրայի ասպատակիչ զորամասը և հասել մինչև Ալեքսանդրետի ծոցը:
Հռոմի պապի և եվրոպական պետությունների օգնության սին խոստումներից հիասթափված՝ ԿՈՍՏԱՆԴԻՆ Դ-ի և Մեսրոպ Ա Արտազեցու նախաձեռնությամբ 1361-ին Սսում գումարված ժողովը չեղյալ է հայտարարել հայ և կաթոլիկ եկեղեցիների միության վերաբերյալ նախկին ժողովների որոշումները, դատապարտել պապականության վարքագիծը:

Հայ մատենագիրները ԿՈՍՏԱՆԴԻՆ Դ-ին անվանել են «այր խոհական » և «մեծ արքա»:
Նրա անունով հատվել է ոսկե դրամ: