KOSTANDIN LAMBRONACI / ԿՈՍՏԱՆԴԻՆ ԼԱՄԲՐՈՆԱՑԻ

Գործունեությունը` Իշխան

Բնակավայրը` Հայաստան

Թագադիր իշխան Կիլիկյան Հայաստանում 1226-ից:

Ծննդյան թիվն անհայտ է:
Մահ. 1250թ.:

Ներսես Լամբրոնացու եղբայր Հեթումի որդին:
Լամբրոն բերդի տեր ԿՈՍՏԱՆԴԻՆ ԼԱՄԲՐՈՆԱՑԻն իր զորաջոկատով մասնակցել է սելջուկյան թուրքերի դեմ Շողականի ճակատամարտին (1216) և գերեվարվել Իկոնիա:
1219-ին Լևոև Բ Մեծագործը փրկագնել է նրան:
Հավակնելով Կիլիկիայի հայոց գահին՝ ԿՈՍՏԱՆԴԻՆ ԼԱՄԲՐՈՆԱՑԻն ընդդիմացել է իր ազգականներին՝ նորահաստատ Հեթումյան արքայատանը, որը հզոր իշխանի հետ հաշտվելու համար նրան շնորհել է թագադրության գործակալությունը:

Այդուհանդերձ՝ ԿՈՍՏԱՆԴԻՆ ԼԱՄԲՐՈՆԱՑԻն, գործակցելով Իկոնիայի սուլթանության հետ, ապստամբել է Հեթում Ա-ի դեմ, որի հետ փորձել է հաշտվել թաթար-մոնղոլներից Իկոնիայի սուլթանության պարտությունից (1243) հետո, բայց մերժվել է:

1245-ին սելջուկյան թուրքերի գլուխ անցած՝ ավերել է երկրի մի շարք քաղաքներ, պաշարել Տարսոնը, սակայն պարտվել է և փակվել Լամբրոնում:

1250-ին հալածական ԿՈՍՏԱՆԴԻՆ ԼԱՄԲՐՈՆԱՑԻն, իբրև դավաճան, սրախողխող սպանվել է, իսկ նրա կալվածքները միացվել են արքունականին:

Տոհմական թշնամությունը վերացնելու համար Հեթում Ա-ն ԿՈՍՏԱՆԴԻՆ ԼԱՄԲՐՈՆԱՑու որդի Հեթումին վերադարձրել է Լամբրոնը, դստերը՝ Կիռ Աննային (Կեռան), պսակել իր գահաժառանգ որդի Լևոնի հետ: