RUSA B / ՌՈՒՍԱ Բ

Գործունեությունը` Թագավոր

Բնակավայրը` Հայաստան

Վանի թագավորության (Ուրարտու) թագավոր մ.թ.ա. մոտ 685-645-ին:

Ծննդյան և մահվան թվերն անհայտ են:

Արգիշտի Ա-ի որդին և հաջորդը:
Հզոր նախորդների նման կրել է «մեծ արքա», «տիեզերաց արքա», «արքայից արքա», «Բիայնիլիի արքա» և այլ տիտղոսներ:
Գահակալման սկզբնական տարիներին, կիմերների և սակերի սպառնալից արշավանքների պայմաններում, Ռ. Բ համախմբել է ուժերը, հիմնել նոր ռազմական ամրություններ ու բերդաքաղաքներ, հիմնականում անխախտ պահել պետության սահմանները:
670-ական թթ. նա դաշնակցել է կիմերների հետ և արշավել անդրեփրատյան երկրներ:
ՌՈՒՍԱ Բ-ն ռազմաքաղաքական սերտ դաշինք է հաստատել նաև սակերի հետ, որոնք այդ ժամանակ հզոր թագավորություն էին հիմնել Կուր գետի արևելյան ավազանում:
ՌՈՒՍԱ Բ-ն զբաղվել է նաև շինարարական աշխատանքներով, նպաստել տնտեսության զարգացմանը:
Զվարթնոցի մոտ պահպանված մի արձանագրության մեջ նա հիշատակում է պարտեզների ու այգիների հիմնման Իլդարունի (Հրազդան) գետից ջրանցքի կառուցման (ցարդ գործում է) և այդ առթիվ աստվածներին զոհեր մատուցելու մասին:
Հեր (Խոյ) քաղաքի մոտակայքում գերմանական հնագիտական արշավախումբը պեղել է ՌՈՒՍԱ Բ -ի օրոք հիմնված մի մեծ բերդաքաղաք:
ՌՈՒՍԱ Բ –ն հիմնել է նաև Թեյշեբաինի բերդաքաղաքը, այլ բերդեր ու տաճարներ: