Թուրքական TRT-ն այսօր Հայաստանի մասին վավերագրական ֆիլմ կցուցադրի

Հուլիս 08, 2012 | 00:04
Թուրքիայի պետական TRT հեռուստաընկերությունը հուլիսի 8-ի երեկոյան 22։45-ին (Երեւանի ժամանակով 23։45) ցուցադրելու է «Հեռու հարեւան» ֆիլմը, որը պատմում է Հայաստանի եւ մասնավորապես Երեւանի մասին։

NEWS.am-ի հետ զրույցում «Հեռու հարեւան» ֆիլմի հեղինակ Գյուլգյուն Ջունդեյբեյօղլուն նշեց, որ ֆիլմը քաղաքական նպատակներ չի հետապնդում, այն նպատակ ունի օտարներին ներկայացնել Հայաստանի մայրաքաղաքի հասարակական եւ մշակույթային կյանքը: Նա նշեց, որ ֆիլմում հայկականությունը պահելու համար օգտագործվել են հայ երաժիշտների ստեղծագործությունները։

Գյուլգյուն Ջունդեյբեյօղլուի խոսքով՝ ֆիլմը TRT-ով ցուցադրելուց հետո նախատեսում են մասնակցել նաեւ միջազգային փառատոնների։

Ֆիլմի ռեժիսոր Օզլեմ Օքուլը նշեց, որ ֆիլմը շատ հրաշալի է ստացվել: «Երեւանը գեղեցիկ քաղաք է: Ֆիլմն էլ գեղեցիկ է ու ունի հուզիչ ավարտ»,-ասաց Օզլեմ Օքուլը:

Ֆիլմի նկարահանման աշխատանքներն իրականացվել են «Ինտենյուս Հայաստան», «Ինտերնյուս նեթվորք» եւ Ստամբուլի Մշակույթի համալսարանի «Համաշխարհային քաղաքական միտումների կենտրոն»-ի (GPOT) կողմից: Ֆիլմի նկարահանումներն անցկացվել են Երեւանում 2011-ի հունիսին:

Ֆիլմի նկարահանման աջակիցներից «Ինտերնյուս Հայաստան» կազմակերպության ներկայացուցիչ Արմեն Սարգսյանը կարեւոր է համարում այն հանգամանքը, որ Երեւանի մասին ֆիլմը նկարահանվել է ոչ թե մասնավոր, այլ պետական հեռուստաընկերության կողմից: Արմեն Սարգսյանի խոսքով՝ ֆիլմի նկարահանման ժամանակ նկարահանող խմբի անդամներն ու ֆիլմի ռեժիսորը նշել են, որ զարմացած են Հայաստանի զարգացածությամբ, քանի որ Թուրքիայում թյուր պատկերացում կա Հայաստանի մասին:


Լուրեր Հայաստանից - NEWS.am http://news.am/arm/news/112585.html