Ադրբեջանցիները հատուկ պարգևներ են ստանում հայ մարզիկներին հաղթելու համար. Ջուլֆալակյան

Հունահռոմեական ըմբշամարտի օլիմպիական փոխչեմպիոն Արսեն Ջուլֆալակյանը, այսօր լրագրողների հետ հանդիպմանն անդրադառնալով Լոնդոնում ադրբեջանցի ըմբիշի հետ մենամարտին, նշեց, որ իր համար մարզիկի ազգությունը կապ չունի և ավելացրեց, որ ադրբեջանցի մարզիկներին իրենց երկրում հատուկ պարգևներ են տալիս նույնիսկ, եթե նրանք մեդալի չեն արժանացել, սակայն հաղթել են որևէ հայ մարզիկի։

«Եթե դուրս ես գալիս գորգ, ուրեմն պետք է հաղթես: Բայց ադրբեջանցի մարզիկի դեպքում պատասխանատվությունը տասն անգամ ավելի մեծ էր»,- ասաց նա:

Հիշեցնենք, որ այդ մարտի ընթացքում դահլիճում գտնվող Ադրբեջանի նախագահ Իլհամ Ալիևը հարցրել էր, թե արդյոք հայ ըմբիշն ուժեղ է և կարող է հաղթել ադրբեջանցի մրցակցին, ապա լքել էր դահլիճը։

Ըստ Ջուլֆալակյանի՝ ի տարբերություն մեր մարզիկների, ադրբեջանցիները հայերի հետ պայքարը շատ ավելի են կարևորում:
«Մեզ համար տարբերություն չկա ազգությունը, սակայն ադրբեջանցիները շատ են կարևորում: Անգամ հայ մարզիկի հաղթելու համար հատուկ պարգևներ են սահմանվում, եթե անգամ մրցաշարում մեդալ չես նվաճել»,- պատմեց մարզիկը:

Խոսելով ռուս մարզիկի հետ եզրափակիչ մենամարտի և այն մասին, որ նա մարմինը յուղել էր, Ջուլֆալակյանը նշեց, որ վերջին շրջանում իր հակառակորդներից շատերն են յուղ օգտագործում, սակայն մրցավարները աչք են փակում դրա վրա:

«Առաջինը թուրք մարզիկն էր և երբ մյուսները տեսան, որ դա որոշ չափով խանգարում է ինձ, իրենք էլ կիրառեցին»,- ասաց նա:

Ջուլֆալակյանը, այդուհանդերձ, իր պարտությունը ռուս մարզիկի մարմինը յուղելու հանգամանքով չի արդարացնում, սակայն որոշել է այսուհետ մարզումների ընթացքում «յուղել» մրցակիցներին և այդպես հաղթել նրանց:

Լուրեր Հայաստանից - Թերթ.am http://tert.am/am/news/2012/08/18/julfalakyan2/