Կօգնի՞ հրեական լոբբին Թուրքիային՝ Ցեղասպանության հարցում շահերը պաշտպանելիս. «Հուրրիյեթ»-ի անդրադարձը

ԱՄՆ նախագահ Բարաք Օբամայի միջնորդությամբ Թուրքիայի և Իսրայելի միջև առկա ճգնաժամը՝ «Մավի Մարմարա» նավի ճգնաժամի հետ կապված, լուծվեց։

«Հուրրիյեթ»-ի հոդվածագիր Զեյնեփ Գյուրջանլըն անդրադարձել է տեղի ունեցածին և խոսել նաև Հայոց ցեղասպանության ճանաչման գործընթացի վրա դրա հնարավոր հետևանքների մասին։

«Իսրայելի վարչապետ Բենիամին Նեթանյահուn Թուրքիայի վարչապետ Ռեջեփ Թայիփ Էրդողանին զանգահարելով ներողություն խնդրեց, իսկ Էրդողանն ընդունեց այն։ Իսկ այժմ ի՞նչ է լինելու»,-հարցնում է հեղինակը։

Նա նշում է, որ ամենահեշտ լուծվող հարցը փոխհատուցման խնդիրն է, քանի որ Իսրայելը «Մավի Մարմարայի» միջադեպի զոհերի ընտանիքներին փոխհատուցում տրամադրելու պատրաստակամության մասին ավելի վաղ էլ էր հայտարարել։

Այլ հարցերին զուգահեռ՝ բոլորին մի հարց է հետաքրքրում. արտասահմանում հրեական լոբբին Թուրքիային կաջակցի՞, թե ոչ։

«Իսրայելի հետ հարաբերությունների կարգավորմանն ուղղված առաջին փորձությունը տեղի կունենա ապրիլին։ ԱՄՆ-ում, Ֆրանսիայում և այլ երկրներում գործող և մեծ կապեր ունեցող հրեական լոբբին՝ նավի միջադեպից հետո դադարել էր աջակցել Թուրքիային։ Այժմ բոլորին հետաքրքրում է՝ ուժեղ հրեական լոբբին երրորդ երկրներում Թուրքիայի շահերին կաջակցի՞, թե ոչ։ Առաջին թեստը կլինի ապրիլին՝ Հայոց ցեղասպանության պնդումներով պայմանավորված, որոնք ամեն տարի ակտիվանում են ամենաբարձր մակարդակով»,- գրում է «Հուրրիյեթ»-ը։

Թուրքիան ԱՄՆ հրեական լոբբիից աջակցություն է ակնկալում նաև ԱՄՆ-ից ռազմական պայմանագրերի և ռազմական աջակցության հարցերում։ Թուրքիան ահաբեկչության դեմ պայքարում կիրառելու համար ԱՄՆ-ից անօդաչու ինքնաթիռներ, ուղղաթիռներ, զենքեր է գնել, սակայն ԱՄՆ Կոնգրեսը վետո էր կիրառում այդ հարցերում։

Հայտնում է tert.am-ը