ԳԵՎՈՐ ԳՐԻԳՈՐՅԱՆ ՍՏԵՓԱՆԻ – Ջիոտտո

Գործունեությունը` Նկարիչ

Բնակավայրը` Հայաստան

Ծնվ. 12(24).11.1897թ., Թիֆլիս:
Մահ. 23.11.1976թ., Երևան:

ՀԽՍՀ վաստ. նկարիչ (1967):

Սովորել է Թիֆլիսի Գեղարվեստը խրախուսող կովկասյան ընկերության նկարչության և քանդակագործության դպրոցում (1916-19, դասատու՝ Ե. Թադևոսյան), Մոսկվայի բարձրագույն գեղարվեստական արվեստանոցներում (1921-23):

1962-ին տեղափոխվել է Երևան:

Ստեղծել է գունային և գծային ինքնատիպ կառուցվածքով դիմանկարներ, նատյուրմորտներ, բնանկարներ («Բնանկար», «Նատյուրմորտ անձեռոցիկով», «Հայկուհու դիմանկարը », երեքն էլ՝ 1922, «Մոր դիմանկարը», «Նատյուրմորտ: Մրգեր», «Հերոսի մահը», երեքն էլ՝ 1929), «Դիանայի դիմանկարը», 1945, «Նատյուրմորտ կիտրոններով», 1962, «Մայրս և ես», 1972), որոնցում դրսևորվել է զուսպ գույներով խոր հույզեր արտահայտելու նրա գեղաևկարչական հակումը:

Թիֆլիսի մշակութային առանձնահատուկ մթնոլորտը, հայ ժողովրդի անցյալը, ռուս, վրացի, հայ մշակույթի ականավոր գործիչները տեղ են գտել Ջիոտտոյի փոքրաչափ գործերում:

Նրա նկարներն աչքի են ընկնում թիֆլիսահայ գեղանկարչական դպրոցին հատուկ զուսպ գեղեցկությամբ, կերպարային բազմազանությամբ:

1977-ին Երևանում հիմնադրվել է Ջիոտտոյիի տուն-թանգարանը (1987-ից՝ ՀԱՊ-ի մասնաճյուղ):