ZABEL / ԶԱԲԵԼ

Գործունեությունը` Թագուհի

Բնակավայրը` Հայաստան

Կիլիկիայի հայոց թագուհի 1222թ-ից:

Ծնվ. 1215թ., Սիս:
Մահ. 1252թ., թաղվել է Դրազարկում:

Լևոն Բ-ի դուստրը:

Հոր կամքով կարգվել է գահաժառանգ, իսկ նրա խնամակալ է դարձել Կոստանդին Գունդստաբլը:

Լևոն Բ-ի մահից հետո Կիլիկիայի իշխանները 1222-ին ԶԱԲԵԼին կնության են տվել Անտիոքի դքսության գահաժառանգ Ֆիլիպին՝ վերջինիս հանձնելով հայկական գահը:

Լատինամետ քաղաքականության համար 1225թ-ին Կոստանդինը Ֆիլիպին տապալել և մահապատժի է ենթարկել, իսկ 1226թ-ին ԶԱԲԵԼին ամուսնացրել իր որդու՝ տասներեքամյա Հեթումի (ՀեթումԱ) հետ և վերջինիս հռչակել Հայոց թագավոր:

ԶԱԲԵԼը հմուտ է եղել ուսման և գիտության մեջ, նպաստել շինարարական աշխատանքներին, 1238թ-ին հովանավորել է Անդուլ մենաստանի վերակառուցումը, Ասում կառուցել Կաթողիկե և Ս. Մարինե եկեղեցիները, 1241-ին հիմնել հիվանդանոց:

Պահպանվել են ԶԱԲԵԼի և Հեթում Ա-ի պատկերներով դրամներ:

Գրակ.
Սմբատ Սպարապետ, Տարեգիրք, Վնտ., 1956:
Ալիշան Ղ., Սիսուան, Վետ., 1885: