ՄԱՐՏԻՐՈՍ ԱԼԹՈՒՆՅԱՆ ՀԱԿՈԲԻ

Գործունեությունը` Ճարտարապետ

Բնակավայրը` Լիբանան

Ծնվ. 1889թ., Բուրսա
Մահ. 20.12.1958թ., Բեյրութ:

1910-ին մեկնել է Փարիզ, ուսանել Դեկորատիվ արվեստների ազգ. բարձրագույն դպրոցում:
1919-ից Բեյրութում նախագծել է հաս. շենքեր, մենատներ, կամուրջներ,
1933-35-ին՝ Լիբանանի խորհրդարանի շենքը` ժամացույցի վերսլաց աշտարակով:
Մարտիրոս Ալթունյանը մեծ ներդրում ունի եկեղեցաշինության ասպարեզում` Անթիլիասի Ս. Գրիգոր. Լուսավորիչ մայր տաճարը (1938-40) և Նահատակների մատուռը, Երուսաղեմի Ս. Հռիփսիմե մատուռը (1946), Բաղդադի Ս. Գրիգոր Լուսավորիչ եկեղեցին (1952-57), բոլորն էլ` հայկական ճարտարապետության ավանդական ձևերի ու ժամանակակից շինարվեստի նոր մտածողության համադրությամբ:
Արդիականի ու արաբական ազգային ավանդականի շաղկապումով է նախագծել Աբու Բաքր մզկիթը Բեյրութում, պալատական համալիրը (մզկիթ, մատենադարան, հյուրապալատ ևն) Ամմանում` Վատիկանի պատվերով, Ս. Պողոս կաթոլիկ, մայր տաճարը (1947-50)` Բեյրութին մերձ հունաբնակ Հարիսա գ-ի մոտ:
Ալթունյանի գեղանկարչական գործերից են` Երուսաղեմի ժառանգավորաց վարժարանի դահլիճի մեծաչափ (12 մ2) կրոնապատմական թեմայով հինգ որմնանկարները, Թադեոս և Բարդուղիմեոս առաքյալների, Վարդան, Հակոբոս, Հեղինե սրւբ՚երի սրբապատկերները (1949-50), Նյու Յորքի համաշխարհային ցուցահանդեսի Լիբանանի տաղավարի նկարազարդումները, ծովանկարները, Անթիլիասի մայր տաճարի աղոթասրահի «Ս. Գրիգոր Լուսավորիչը մկրտում է Տրդատ արքային» կտավը, Ավագ խորանի «Մայր Աստվածածին» սրբանկարը (բնորդը Ալթունյանի կինն է):
Հեղինակ է նաև քանդակային գործերի (Լիբանանի ազգ. զինանշան-մեդալ ևն):
Արժանացել է Լիբանանի նախագահի Պատվո արծաթե մեդալի:
Մ. Ալթունյանի գործերը ցուցադրվել են Երևանում (1999):