ՅՈՆ ՔԱՋ

Գործունեությունը` Զինվորական գործիչ, Քաղաքական-պետական գործիչ

Բնակավայրը` Հայաստան

Հղումներ` ru.wikipedia.org

Նույն ինքը՝ Յոան Հայ:
Հակառակորդները կոչել են նաև Անգութ, Ահարկու, ժողովուրդը՝ «Մոլդովայի հայր»

Զորավար, քաղաքական գործիչ, Մոլդովայի հոսպոդար 1572թ-ից:

Ծնվ. մոտ 1521թ, Սուչավա (այժմ՝ Ռումինիայում):
Մահ. 14.06.1574թ., Ռոշկան (այժմ՝ Մոլդովայում):


Դաժանորեն ճնշել է բոյարների խռովությունները, ռազմավարական նպատակով մայրաքաղաքը Սուչավայից տեղափոխել Յասսի (Յաշ), Մոլդովային միացրել Խոտինի բերդը, ստեղծել իշխանական խորհուրդ, բռնագրավել վանքապատկան կալվածները, իր պատկերով կտրել պղնձե դրամ, մանր հողատեր գյուղացիներից հավաքագրել ուժեղ բանակ:

Փորձել է ստեղծել եվրոպական տերությունների դաշնակցություն ընդդեմ օսմանյան Թուրքիայի:

1574թ-ի ապրիլին ջախջախել է սուլթանի հրամանով Մոլդովա ներխուժած Վալախիայի և Տրանսիլվանիայի իշխանների միացյալ ուժերը, մտել Վալախիա, գրավել Բուխարեստը, ապա Բենդերիի և Աքքերմանի մոտ պարտության մատնել օգնության եկած թուրքական զորքերին:

Սակայն Սելիմ II-ը նրա դեմ է հանել Ռումելիի բեյլերբեյին ու Ղրիմի խանին՝ 200-հազարանոց բանակով, և Յոն Քաջը ստիպված նահանջել է Ռոշկան:

Հավատալով թշնամու կեղծ երդմանը՝ ներկայացել է թուրքական զորաբանակի հրամանատարին և վրանում դաշունահարվել:

Յոն Քաջի կյանքին ու գործունեությանն է նվիրված Բ. Պ. Հաշդեուի «Յոհան իշխան Ահարկու» (ռում., 1865) մենագրությունը:

Գրակ.
Կամենից, Տարեգիրք հայոց Լեհաստանի եւ Ռումէնիոյ..., հրտ.՝ Ղ. Ալիշան, Վնտ., 1896:
Գրիգորյան Վ., Յաշ քաղաքում հայկական դատարանի մասին վկայող մի ուշագրավ վավերագիր, «Տեղեկագիր ՀՍՍՀ ԳԱ, հաս. գիտ.», 1961, № 9: